Kepingin Daging Rendhang

Kepingin Daging Rendhang

            Ing sekolahanku, MIN Rejoso, jadwale ekstra pilihan iku ing dina Rebo. Nah,dhek dina Rebo, tanggal 13 November 2013, ana kedadeyan sing kanggoku lucu banget, malah kaya ora bisa nglalekake nganti dinane iki.

Wektu iku jam 12.35 WIB, aku rak arep shalat Dhuhur sing panggonane ana sisihe ruwang guru, ning sakdhurunge nang sholatan mesthi ngliwati ruwang guru, wong papan shalate paron karo ruwang guru,hehehe…

Sakdhurunge wudlu aku ngliwati mejane Ustadz Misbah kang pener ngarepe jedhing. Wah, beliaunya nembe asyik murak bontotan saka omah. Tak lirik sega putih lawuh rendhang daging. Hemm…enak, batinku. Tur ambune rendhange jan nyegrak, ngono…

“Monggo, Ustadzah, menawi ngincipi?”, aloke Ustadz Misbah sajak ngerti isine atiku sinambi muluki sajak nikmat.

“Oh, enggih, kula badhe shalat…!”, semaurku karo mlebu jedhing. Pikirku, wong iwake sakbungkus plastik seprapatan mesthine rak turah nganti aku bubar sholat Dhuhur.

Olehku sembahyang Insya Alloh ya tuma’ninah neng rakaat pertama, hla kok neng rakaat kedua krungu swarane Bu Nurul saka meja liya. “Ngapunten nggih Ustadz, kula ngincip rendhange,…”. Dheg, batinku. “Alah gak pa pa wong paling ngincip mung siji, mesthi engko jik onok turahe”, batinku nyuwara. Aku nutugne sholat, tapi kupingku iki lho kok krungu ae jagongane ustadz Misbah karo Bu Nurul iku mau. Mulai ora tuma’ninah shalate, sajake…

“Monggo, monggo, niki tasik kathah,…!”, jawabe Ustadz Misbah.

“Enggih suwun, setunggal mawon”, aloke Bu Nurul.

“Lho, mboten usah setunggal, sedaya mawon, kula nek maem sampun mantun, kok!”, jawabe Ustadz Misbah maneh. “Ning mboten wonten sekule”.

“Lho, nggih sembah nuwun Ustadz,…”, ujare Bu Nurul.

 “Wah, uueecaa..Ustadz, empuk tur kraos bumbune, mboten napa-napa lintune kula beta mantuk mawon damel lawuh teng griya”, Bu Nurul nambahi. Wah, Bu Nurul ngincipi iki, batinku karo cleguken dhewe pas rakaat pungkasan.     

Alhamdulillahirrobbil alamin, shalatku ya mentas, tapi mbuh pahalane, wong disambi karo mikir daging rendhang, hehehe…

Nuwun – Cuthel 

(Dimuat ing Rubrik Ana-ana Wae - Jaya Baya edisi  November 2013)