Dangdut Nasional

Dangdut Nasional

Pas istirahat jam pertama, aku mlaku menyang ruwang perpustakaan, nalika ngliwati ngarepe kelas IIIb,  bocah-bocah dha nggawe sepatu karo nyanyi dangdutan sing lagi ngetrend ,”Mending tuku sate timbang tuke wedhuse, mending…”. Apal plek!. Pancen sekolahan nggenku kelase paralel nganti 22 kelas, aku dhewe ngulang kelas enem, dadine bocah-bocah kelas telu ora sepira wedi utawa sungkan karo guru sing ora mulang kelase, malah, nalika aku mandheg sedhiluk nyawang bocah-bocah kuwi, hla kok tambah ndadi olehe joged karo nyanyi sajak seneng onok sing ndelok. Owalah cah-cah,…

Ndilalahe dina iki mau aku yo pas dadi guru piket, lan ngisi jame guru SBK sing diutus nderek rapat neng Jombang. Aku ngleboni kelas IVb. Tugas daktulisna, sing mari banjur dakbiji. Nganti wis bar kabeh olehe nggarap, jame isih durung wayahe ganti, bocah-bocah dakajak nyanyi lagu nasional. “Lagu nasional apa wae sing wis iso, Cah?”, takonku. Ora ana sing semaur.

 “Wis ayo nyanyi bareng lagu Maju Tak Gentar”, aku nyuwara. Hla kok ora onok sing apal. “Ganti, lagu Padamu Negeri”. Malah ora onok sing iso. “Ndangdut mawon, Bu?”, keprungu swara banter saka mburi. “Ora pareng!”, semaurku karo isih ngelingi kedadeyan wayah istirahat mau.

“Bu, nyanyi lagu Ibu Kita Kartini mawon, kula sakanca saged soale mpun diwulangi”, bocah wadon ngarep dhewe nyuwara.

“Nggih, wis. Ayo nyanyi bebarengan!”. “Siji, loro, telu”, …

Akhire, sakkelas padha bareng-bareng nyanyi lagu Ibu Kita Kartini, apal lan lancar. Tapi, iki nyanyi sing kaping pindho, soale nyanyi pertama digawe model koploan, lan sajake wis dha lancer sak tabuhane meja barang, lha piye mben oleh saklarik terus dha diimbuhi tabuhan karo uni..bukak thithik jos…, contone, Ibu Kita Kartini putri sejati, putri Indonesia harum namanya, bukak thithik jos…. “Lho lho lho ?”, lagu sakkal dakendheg. “Wah, enak ngaten, Bu. Dangdut nasional..?”, bocah-bocah komplain.

Sakdurunge ganti guru jam terakhir, aku nyempatno takon,”Cah, lagu nasional apal mung siji loro, hla yen lagu dangdut, apal pirang lagu?”. Walah, piye jawabane, “Oh, nggih apal sedaya, Bu…!”. Owalah, cah cah, ora iso nyalahna sampeyan, piye pancen wis jamane mbokmenawa. Hehehe…

                                                Cuthel