Foto Jinjit
Ngepasi nunggoni bocah-bocah kelas
enem foto kanggo ijazah ngene iki aku isih ora iso nglalekake kedadeyan tahun 2012
kepungkur.
Tahun wingi saka murid kelas enem
sing jumlahe 92 bocah, foto sing dadi mung 88, padahal kabeh wis melu foto. Mulane
Mbak Luluk, pegawe tata usaha, banjur nimbali bocah papat sing fotone ora dadi
mau supaya sesuk esuk foto maneh.
Ndilalahe bareng ditimbali, bocah
papat mau wadon kabeh, lan cendhek kabeh. Weruh kuwi,sanalika lambeku sing
pancen tipis ilate alok,”Cah, sampeyan ngerti kena ngapa kok fotone sampeyan
ora dadi?”. Bocah papat mau mung pating plenggong. Siji semaur,”Mboten ngertos,
Bu!”. “Soale sampeyan cendhek kabeh, mulane sesuk yen pas difoto kudhu jinjit
ben iso mlebu kamera, nggih?”, jawabku kanthi serius. Kanca-kanca ing kantor
mung dha mesam-mesem. Ngerti yen aku mung mbujuki.
Ndilalahe, pancen murid kuwi
ngestokna dhawuhe gurune, pas difoto maneh siji mbaka siji, petugas fotone olehe
ngguyu kepingkel-pingkel. Petugas foto crita neng ruwang guru,lha piye, mben
pas arep dijepret bocah-bocah padha jinjit. Nalika didangu, jawabe kanthi
jujur,”Kersane klebet teng kamera, Pak. Terose Bu Eni menawi mboten jinjit,
mangke fotone mboten dados malih”.
Krungu
critane petugas foto mau, isoku mung isin ewuh pakewuh. Batinku,”Owalah cah
cah,…mosok yo padha ora ngerti yen Bu Guru mung guyon?”.
Tidak ada komentar:
Posting Komentar