Nasibe Topenge Anakku

Nasibe Topenge Anakku

Udakara rong minggu kepungkur, tanggal 28 Januari  2014, anakku oleh tugas saka Bu Dian, gurune SBK dikongkon nggawe topeng. Wiih, senenge jan ora jamak. Mulih sekolah langsung golek lempung dienggo babonane topeng. Dheweke wira-wiri nglumpukna kertas, kanji, karo lengser. Wis, aku sing ora ngerti apa-apa ditugasi nggodhok koran dicampur kanji. Kabeh beres, dheweke mulai nyithak topeng. Kari mepene. Ealah, anakku yo iso nggawe topeng tibake…

Ndilalahe udan nggrecih rong dina ,malah ing ngendi-endi banjiran, topenge di jarno wae ana ing ndhuwure meja belajar, karo ngenteni panas. Kenek dibedhek, topenge ora kober garing, malah dikruyuk semut. “Buk, topengku dipangan semut”, jerite anakku weruh topenge mbrindili ilang kanjine. “Owalah, le..udan-udan ngene, semute luwe, gak onok sing dipangan, dadine kanjine topeng dikruyuk…!”.

Akhire, topeng kapisan ora dadi. Nanging, bocahe ora patah semangat, banjur nggawe maneh topeng sing ke-loro. amrih ben cepet garing bengine didobeli dikipasi karo kipas angin, wer…wer…wer…, nanging topenge kok yo ora garing-garing? Malah wis dipepe ing panas srengenge sedina muput.

“Buk, topengku kok mboten garing-garing,nggih…padahal wis dipepe karo dikipasi barang?”.

Dak delok, tibake, lempunge ketelesen, dilemeki lengser pisan, dadine bubure mbanyu terus. Banjur njemumut mbrodholi gak kenek diangkat.

Ora let suwe, kanthi semangat papat lima, anakku nggawe maneh topeng sing ka-telu, dakdelok apik, soale wis sinau karo rong pengalaman sakdurunge. Apik tenan!. Bareng wis garing, dakgawa nang sekolahan, kari ngecete, gampang soale arep dicet bareng-bareng kancane sakkelas.. Amarga dina Senin wingi mulih isuk, topenge dititipna nang lemari guru. Lho, sesuke getun keduwung olehku nyawang, topeng sing uuapiik mau dikrikiti tikus. Den baguse sekolahan keluwen be’e, sampek topeng kertas dipangan.kabeh dijur, ninggal mripat karo irunge topeng. Jan cilaka, yen koyok ngene!.

Anakku getun temenanan, aku malah rumangsa kedosan. Mulane Selasa awan aku melu tanggung jawab ngrewangi nggawe topeng maneh. Saiki wis ora usah nggawe bubur kertas, nanging model kertas dicelup, niru carane sing neng LKS. Amarga diuber wektu ndang diklumpukna.

Sakwise topeng ka-papat dadi, aku nggremeng dhewe,”Owalah, le…nggawe topeng wae kok nganti ambal-ambalan…!”.