(Ana- ana Bae) Tumbuk kamot teng Jaya Baya No. 29 Minggu III Maret 2016

Tumbuk

Dhek tanggal 27 Februari 2016, aku sakbatih, dumadi saka bapak ibuku lan aku, diampiri mobile paklikku, Mbah Amin dijak sambang sedulur sing lagi opname neng RSUD Lumajang. Neng njero mobil wis ana mbah Amin sekalian, Mbah Juki, lan salah sijine tangga apik sing kepengin melu nyambang uga. Kanggo mbasakna nang putu-putu, aku sakdulur yen nimbali pakdhe budhe, paklik bulik, kanthi marabi ‘simbah’.

Lelungan kaya ngene iki sing paling taksenengi, wis gratis, disusul nang ngomah, kari lungguh bleng. Mobile apik, tumpakane penak. Aku sing jejer paling enom, milih lungguh mburi karo nyawang njaba sinambi ngrungokake jagongane para pinisepuh.

Nalikane mlebu kutha Lumajang, Mbah Juki ngendika ”Sajake iki wis meh tumbuk, ya Lik Jupri?. Senajan mangsa udan, ning hawane jik sumuk ae”. Mbah Juki sajak gerah senajan AC-ne wis diurubna.

Bapakku sing lenggah sandhinge ngguyu, karo semaur “Pakdhe, nek nurut itunganku, tumbuke tasik mangke tanggal kalih likur Maret”. Bapak sing pancen seneng etung-etungan njawab sajak serius. “Panci sakniki wonten owah-owahanipun mangsa. Senajan rendheng, nanging menawi bar udan hawane sumuukk mawon”.

Ndilalahe ibuku sing lagi jagongan liya nyemauri, nrambul melu ngomong “Biyasane sing seneng tumbukan (sundhang-sundhangan) iku wedhus, ya?” . Sakkala gerr aku lan liyane ngguyu bebarengan.

  Hla kok neng sela-selane guyu, Mbah Amin jik nyambung,”Yu, jik eling ta, jaman cilikanku, mben dina aku sampeyan ingahi sega neng tumbuk”. Hahaha, guyune wong sakmobil  sansaya banter.

“Niku namine tumbu, Lik Amin”, aloke Ibu nerangake.

Hla yo pancen lelungan karo wong sepuh-sepuh, jagongan parikena isa nambahi rumakete paseduluran. Owalah, jaka sembung menek korek...jagongane gak nyambung rek, hehehe...