Yudhis Gendhis Ae (Crita Romansa)

Yudhis Gendhis-Ae

Reuni 2018

“Tibake adhewe sakkancaan ya akeh sing tiba jodho, ya?” cluluke Rihan sinambi kethap-kethip lucu nang aku. Hahaha...

Rihanna teka bareng Dhimas sinambi nggendhong putrane sing jik umur setengah taun. Kanca-kanca liyane uga dha teka nggawa gandhengan dhewe-dhewe. Wis payu kabeh sajake.

Ya ya ya. Dina reuni pancen dina sing paling endah nggo ngelingi mangsa sekolah mbiyen. Apa maneh nek reunine wektu nekani nikahane kanca!

 “Terus piye mula bukane kok Yudhis seneng awakmu, Gendhis? Kuliyahmu rak adoh-adohan tur sakdurunge ya gak tau onok swara tir padha irenge? Kit bareng karnaval macak polisi mbiyen, tah? Hahaha...guyu gumberah ka lambene kanca-kanca ngebeki kamar temantenku!

Limang taun kepungkur

 “Wulan Agustus ngene iki nek isa bar tanggal siji, langsung pitulas, langsung tutupan. Wegah aku nek kepethuk tanggal 29 Agustus,” omonge Yudhis kemrecek neng sandhinge kupingku. Alamat onok apa-apa nek Yudhis wis ngomong koyok ngono!

“Apo’o? Arep ngrubah urutane tanggal tah?” takonku macak mblilu.

“Ndhis, ngerti se nek aku kepilih macak mBali nggo karnaval sukmben.” Omonge mbek nggedhrug-nggedhrugna sikile koyok arep nge-band. Neng ngarepku. Ngarepe mejaku!

Aku manthuk. Ya ngertilah! Sapa sing gak melok kejet-kejet nalika dheweke kepilih dadi pasukan Bhinneka Tunggal Ika macak mBali disandhingna karo Rihanna. Ngerti Rihanna arek IPA 2? Nek ayune se imbang mbek aku. (Kan ayu iku relatif, ya se?) Pintere ya padha ae-lah. Bedane, Rihan pinter nyanyi. Biduanita nomer siji neng SMU-ku. Swarane uenak nek dhong maju ketampil ngono ika. Hla dheweke iku penyanyi neng grup band-e sekolahan sing digawangi Yudhistira! Aku? Ya mek bageyan keplok-keplok neng mburine panggung karo nyepakna kostume Yudhis! amarga aku klebu tim desainer kostum-e. Ngonsep engga nyetelna klambi, iku bageyanku. Ngotong-otong sragame sakehe kegiyatan ekskul nek lomba ya aku. Kasenenganku pancene, kok!

Beda sing nyolok mripat sakliyane aku gak isa nyanyi, pakulitanku beda banget karo Rihan. Rihan kuning nemu giring Aku? Sawo mateng sing rada kematengen! Gendhis jawi, hihihi...

Sapa ae sing kenal Yudhis mesthi paham nek dheweke nguber Rihan pol-polan. Gak mek kanca saksekolahan, guru BK uga ngerteni, kok! Piye guru BK gak ngerti, wong Yudhis nate konangan meksa nggonceng Rihan, ning Rihan malah mlayu nang ruwang BK!

“Terus onok apa?” takonku karo nutugna nulis jadwal geladi resik karnaval sesuk. OSIS pancen dadi garda ngarep sing kudu nyuksesna acara lomba-lomba agustusan, klebu karnaval.

“Rungokna ta lah nek onok wong ngomong!” Yudhis nyuwara banter sinambi mbateg pulpenku. “Yudhis!” bengokku. “Wegah aku ndelok polahmu. Gak onok urusane karo aku mbekna!”

“Nek perlu kaca mata kandhelmu iku bukaken, ben isa nyawang raiku sing wis kentekan banyu mata iki!”

Adhuh adhuh adhuh...nek Yudhis wis alok ngono iku artine..

“Oke, siyap ngrungokna!” jawabku akhire sinambi nutup cathetan.

“Isuk iki aku dikabari Bu Dewi nek pasangan mBaliku ganti Soraya arek IPS 3. Amarga Rihanna milih macak Jawa Tengah karo Dhimas. Klambine wis disiyapna ibuke Dhimas jarene.”

Bolpen neng tanganku takunyer-unyerna. Aku wis ngerti apa sing diomong Yudhis. wong mambengi aku wis jagongan karo Rihan! Sapa ae ngerti nek ibuke Dhimas pancen nduwe sewan klambi manten!

----------

“Han, mosok mek mbarengi Yudhis neng karnaval ae gak gelem? Please, deh. Mesakna!”

“Kok gak mbek awakmu ae? Soulmate-e ngono?” jawabe Rihan karo sledhat-sledhot koyok biyasane.

“Yudhis emoh nek karo aku. Mosok bareng klentheng, ngono jarene. Aku tak sing moto ae,” jawabku semu isin. Pancen Yudhis senengane nyeluk aku Klentheng neng ngarepe arek-arek!

“Apa mek merga Yudhis milih aku, aku kudu manut? Kanca kulite kuning ya jik akeh, kok...ngomonga ngono. Aku ya emoh mbek Yudhis. Arek sok pilih-pilih. Aku takmacak liyane ae. Wegah diatur-atur!”

“Sing ngatur ya sapa, Han? Wong wis ditentokna Bu Dewi ngono. Maksudku...,” alokku nutugna.

“Koyok gak ngerti ae. Senajan sing nentokna Bu Dewi susunane wis ditata mbek arek OSIS. Sapa sing onok walike? Yudhis!”

“Huss, suudzon ae senengane!” jawabku karo ngguyu.

“Aku gak suudzon, kowe rak tangane Yudhis! Mbak sekretaris OSIS sing manis!” Rihan melet duwawa neng hape-ne.

Ning aku ngrai kebo ae nek wis konangan ngene.

“Han, adhewe rak ngerti se, nek Yudhis seneng awakmu? Senengna atine pisaaann ae, ya?” bujukku maneh.

“Wegiaahhh. Aku ya siyap gak dadi penyanyine band-e sekolahan nek Yudhis terus ae nguber modhel preman pasar!”

Pancen sakrepotan nggolek pasangan nggo karnaval. Mbayangna Bu guru bageyan Bhinneka masang-masangna muride jane ya mesakna. Nek tiba cocog, gampang. Nek dha gak cocog lan gak gelem, gak dadi-dadi akhire. Paling akeh ya njaluk dipasangna karo...cong-congane, klebu Rihan milih mbek Dhimas!

Tiba aku sing ngrumangsani pancen luwih akeh sing isa dipilih ka murid ewonan tinimbang aku sing biyasa-biyasa ae, aku ya monat-manut ae trima macak mbok tani tah macak olahragawan saben karnaval. Nggo sukmben aku macak Polwan, klambine wis disilihna Yudhis saka sedulure sing dadi polisi.

Jujur ae aku dhewe gung tau ngrasakna kepilih dadi putri-putrian kejaba macak pager ayu neng kawinane keluwargaku, hehehe

            ---------------------------------------------

“Saumpama ibu karo bapak kulite kuning palinga aku isa mbarengi Yudhis pas karnaval, ya Mbak?” sambatanku nang Mbak Naning.

“Halah. Sakumurmu iki sing disawang jik werna kulit, dedeg piyadeg, penganggo. Iku kabeh nomer loro, telu, lan sakteruse. Uteg uga ketrampilan diutamakna, iku sangune urip! Deloken Mbak saiki, apa gela merga mek nduwe rupa pas-pasan kulitku ya ireng menges gak onok manise blas? Gak madolna jaman sekolah? Gak! Sawangen Mas Bayu. Ngganthenge ngalah-ngalahi pemain bola saka Perancis! Ndelok apa wektu milih Mbak Ning dadi bojone?”

Ah, khotbahe mesti tekan kene! Mbakyuku sing pede-ne ngepol kit cilik. Pioner kanggoku!

Ngapal aku omonge Mbak Ning. Piye mula bukane Mas Bayu sekonyong kodher nang Mbak Ning sing ahli ilmu kimia. Penelitiane isa ngarumna jenenge Indonesia wektu kuliah. Mas Bayu iku sapa? Wartawan sing mbaturi, ngliput, lan mawancarai nalika menang ing luwar negeri. Wartawan sing akhire kepilut nang mbakyuku sing meneng, anteng, ning piawai ing laboratorium!

“Aku gak nyawang Yudhis. ning aku ngerti nek awakmu seneng dheweke!” wakakakaka...

“Ojok melik disenengi wong liya nek kowe dhewe nggak nduwe kamanjilan apa-apa. Jok nggedhekna pangrasa iri. Apa kaluwihanmu, unggulna. Gak usah minder marang perkara sing mbokanggep kekuranganmu!”

Piye akhire wektu karnaval tenan?

Hahaha...deloken lah neng omahku potone sing takgedhekna sakkamar. Yudhis akhire pilih macak dadi polisi mbaturi aku!

Dina iki

Apa sing diomong mbak Naning nalika jaman sekolah gak onok sing salah. Urip iku pancen kudu nduwe prioritas. Nalikane prioritas sing kawitan kecekel tangan, prioritas liyane nyedhek dhewe. Semono uga tresna kanggoku!

Nyenengi dhewean kit jaman sekolah tanpa dimangerteni pawongane pancen njelehi. Ning kuwi takdadekna penyemangat nalika aku adoh saka dheweke.

Iya. Jujur aku nyenengi Yudhis kit wiwit kenal. Aku gak isa mapakna awak minangka pawongan sing disenengi, ning aku ndadekna awakku minangka pawuhan sing siyap nampani sakehing crita ngenes saka lambene kit jaman sekolah. Senajan pisah mangsa kuliyah, aku isih uga mapakna awakku kadidene kanca sing gelem disambati sakwayah-wayah.

Kapan aku kepethuk Yudhis maneh?

Ssttt, takcuplikna critane Yudhis nang kanca-kanca lanang jaman SMU saka pangupinge adhiku sing mbaturi lungguh ing ngarep!

“Nalika ibu ngutus aku ngejak kanca nekani wisudhaan ing akademiku, aku langsung ngejak Gendhis. Ning dheweke nulak. Malah Gendhis pamit wis cukup olehe ngancani aku saksuwene iki. Bar iku, pleng gak isa takubungi maneh. Sapa ngira dadine koyok ngono? Wiwit daftar, tes, engga sakehing ujian ing pendhidhikanku Gendhis tansah aweh sumbang surung nyemangati. Tiba takjak nekani wisudhaku kok gak gelem? Tanpa kaweruhan dheweke, seminggu sakdurunge acara, aku mabur mulih!”

“Sapa sing gak ngerti nek Gendhis seneng nang aku kit mbiyen mula? Aku ngerti! sakndhuwure ngerti malah. Gendhis sing manis, Gendhis sing praten lan open nang aku sing brangasan! Nanging aku gak wani nibakna pangrasa tresnaku amarga aku gak nduwe modhal apa-apa engga aku isa nduwe swiwi kanggo panguripanku!”

Isaku mek ah uh ngetutna obahe lambene adhikku!

Seminggu sakdurunge wisudhane Yudhis, setaun kepungkur

Wengi iku, nalikane njedhul neng omahku, dheweke mbegarna klambi sing takposna nggo wisudhaan kanthi tenger YG-Ae ing gulune! Brand YG-Ae ~Yudhis Gendhis-Ae~ sing ngumbulna jenengku minangka desainer!

Yudhis matur bares nang bapak ibu nek arep ngejak aku nang acara wisudhane. Temalah langsung matur niyat ngrabi saumpama diidini. Bayangna! Yudhis nakokna aku kanthi gentle!

“Gendhis, kowe saksine nalika aku nguber-uber sapa ae jaman sekolah. Uga ngerteni sapa ae sing taktaksir nalikane kuliyah. Geneya aku nibakna pilihan nang Gendhis?” mripatku takambakna nampani pangucape. Yudhis sing saiki beda tenan karo sing takkenali! Luwih diwasa lan wicaksana, ehem...

“Amarga aku percaya, arek wedok sing weruh elekku, ngerteni kekuranganku, ning tansah nutupi kanggo kabecikanku, mesthi cocog kanggo ndhedher winihing katresnan engga tuwuh panguripan anyar kang luwih apik saka aku!”

“Wiwit saiki tulung atiku desain-en uga, ya?”

Aku mek mesem ngrungokna, ning panyawangku ngetokna sakehing ukara sing gung nate takomongna!

Cuthel

Sip. Dhien Nurhayati

MTs Negeri 9 Jember–Jember

Jln. Panjaitan 02 Wonorejo Kencong Jember (68167)

No.hp 081252249232

Rek. Bank Jatim 1412015009

a.n. Eni Siti Nurhayati